Rog aise bhi gham-e-yaar se lagg jaate hain
Dar se uthte hain tou, diwaar se lagg jaate hain
Ishq aaghaz mein halki si khalish rakhta hai
Baad mein sainkrroun aazaar se lagg jaate hain
Pehle pehle hawwas ik aadh dukaan khoulti hai
Phir tou bazaar k bazaar se lagg jaate hain
Be-bassi bhi kabhi qurbat ka sabab banti hai
Ro na pa’ain tou galay yaar se lagg jaate hain
Katranain gham ki jo galiyoun mein urri phirti hain
Ghar mein lay aao tou anbaar se lagg jaate hain
Daag daaman ke hon, dil ke hon, ke chehre ke Faraz
Kuch nishaan umr ki raftaar se lagg jaate hain
1 comment:
wah wah...last shair made me remember surf excel advertisement 'daag tu ache hote hain' :)..waisay its true that these scars define us as we grow older and then at some stage of life we sing '"dagh-e-dil hum ko yaad anay lagay"...'On a positive note, these scars can make us more humble and understand the true meaning of life too..
Post a Comment