Assalaam'alaika Ya Abul Fazal Abbas Alamdaar...
Why is this the one of the
most favourite of all phrases that have ever been uttered by this lowly tongue... I can never reach a conclusion.
There's always a sudden surge of bliss that runs down this ignoble soul of mine for some reason.
~
Naubat bajji, sajji woh khayaloun ki anjuman
Paida hui jabeen-e-takhaiyul pe ik shikan
Bikhri shafaq ki mouj main dhul dhul ke her kiran
Pehna uroos-e-waqt ne ghairat ka pairahan
Ubhra hai maahtaab jo “Umul Baneen” ka
Milta hai asmaan se muqaddar zameen ka
Allah rey bachpane mein yeh Abbas ki phaban
Angrraiyoun mein gum hai qayamat ka baa'nkpun
Tewar hain shookh shookh tou chehra chaman chaman
Ankhain shafaq shafaq hain tou zulfain shikan shikan
Abbas kibriya ka ajab intekhab tha
Tifli mein bhi Ali ka mukammal shabab tha
Mayaar mein urooj tou kirdaar lazawaal
Guftaar mein tha nutq-e-imamat ka har kamaal
Raftaar mein woh azm ke mehshaar bhi paimaal
Chehray pe woh jalaal ke yaad aye Zuljalaal
Abbas karbala mein who johar dikha gaya
Boorrhay bahaduroun ko Ali yaad agaya
Abbas ouj-e-haq bhi guroor-e-anaam bhi
Azbar tha jisko mas'haf-e-haq ka kalaam bhi
Husn-e-furough-e-sabar-o-naseer-e-imam bhi
Bhai bhi tha, musheer-e-safar bhi, ghulam bhi
Abbas bandagi mein who aaqa nawaz tha
Shabbir fakhar kartay thay, Zainab ko naaz tha
Jiski jabeen ke bal se zyada na thi furaat
Virsay mein paagaya jo shuja'at ki kaainaat
Qadmoun ki thoukaroun se lipattay thay moujzaat
Muthhi mein Buturaab ki haibat ke hadsaat
Abbas ka waqar qayamat ki cheez thi
Sabr-o-raza ghulam, sharafat kaneez thi
Har simt haadsoun ki sinanen garri rahin
Nazrain faraz-e-arsh-e-barin se larri rahin
Pa'oon ki thoukaroun mein rakabain parri rahin
Kabze mein zulfiqar ki nabzain arri rahin
Har shab ke dil mein jiski chamak ka hiraas tha
Abbas woh azeem sitara shunaas tha
