Hussain(AS) likhna

Khuloos-e-dil ki roshnaee lay ker

Ba-deed-e-ter Hussain likhna

Tum aisa karna kitab-e-dil ke

Warq warq per Hussain likhna

Kasheed ker gulab ka arq

Fiza main peham charrak'na usko

Phir in sunehri fiza'oun per tum

Roshni ka paiker Hussain likhna

Azaan daingi tumhari aankhain

Namaz misray adaa karay gi

Tum aisa karna ke raah-e-Haq main

Hussain perh ker Hussain likhna

Haroof khushboo k phool bun ker

Tumharay seenay main khil uthaingay

Tum aisa karna k apni aankhon

Aur aapne lub per Hussain likhna

Tumharay tareek manzar'oun main

Ujalay phootaingay noor bun ker

Tum aisa karna k apnay ghar main

Darood parh ker Hussain likhna

Hussain likh ker phir usko likhna

Phir isko likh ker tum aisa karna

Ke aaj tak jo bhi likha ho

Tum uska mehwar Hussain likhna

Wo barchiyaa'n wo chamktay khanjer

Wo taptay sehra pukarty hain

Tum aisa kerna ke Karbala ke

Badan pe ja ker Hussain likhna

Ager kitabat ka shouq ho to

Kitab-e-sabr-o-raza main Rahat

Jahan shaheedou'n ka naam likhna

Tou sub se oper Hussain likhna

-Syed Rahat Hussain Rahat