The sloth handed me an empty little bottle of scent a few days ago. Sloth's favorite scent, I reckon; it's some fragrance by Issey Miyake.
-
There were times when I could not comprehend what you were, what your existence was. However, this very moment, as I snuggled into the arms of an airy fragrance that caressed my senses - the answer occurred to me, like an epiphany only.
Khushbu! Khushbu ho tum. Eik aisi mehsoor-kun khushbu jo hosh-o-khirad per kaabiz hojaye. Eik aisi khushbu jo wujood ke har ik issay mein bas jaye; jo khud wujood ka hissa ban jaye. Aisi khushbu jo alam-e-wajd mein le jaye; jo aas paas se beygaana kardey. Eik aisi khushbu jo dil-o-dimaagh ke nihaan khaanoun mein kahin chhup kar baith jaye.
Haan, haan khushbu he tou ho; jo saari fiza mein muntashir ho jaye; aur phir har guzartey lamhe ke saath madhum se madhum tar hoti chali jaye, yahan tak ke mukammal taur per ma'dooum hojaye. Wahi khushbu jo koi bhoola bisra khayal ban jaye. Aur jo kabhi ye khayal yaad-e-guzishta ke band kiwaar khol kar maazi ke dareechoun se jhaankay tou... eik mubham se muskurahat taskeen-e-jaan ka baa'is ban jaye. Phir jab yaadasht per gard-e-waqt ki teh dabeez se dabeez tar hoti chali jaye tou mehaz ik pareshan yaad ban jaye. Eik aisa khayal jiska suraagh na lagaya jasakay.
'Yeh khushbu... issay janta hon mein... bohat manoos si mehsoos hoti hai, magar... magar kuch yaad nahi parta...'
Eik aisi khushbu jo waqt ke saath saath sha'oor se nikal kar lasha'oor mein bas jaye, aur phir- lasha'oor ke ghannay jungloun mein raasta bhatak jaye- humesha humesha ke liye...
Haan bilkul aisi he khushbu ho tum. Eik hoshruba khushbu, jissay eik din mere lasha'oor ke jungloun mein kho jana hai- humesha ke liye.
Kaash iss khushbu ko kissi sheeshi mein qaid kiya jasakta.
No comments:
Post a Comment